सोमवार, जानेवारी १८, २०१६

कॉम्रेड ए. बी. वर्धन यांची संपत्ती उघड

ए. बी. वर्धन 

साभार- मटा ऑनलाइन वृत्त। मुंबई


गडगंज संपत्ती, गाड्या-बंगले, तामझाम आणि उद्योगातील भागीदाऱ्या यात यशस्वी होणे अशीच नव्या पिढीतील नेत्याची ओळख प्रस्थापित होत असताना नुकतेच निधन पावलेले ज्येष्ठ कम्युनिस्ट नेते ए. बी. वर्धन यांनी मात्र तत्वनिष्ठ आणि सेवाभावी नेत्याचा आदर्श समाजासमोर ठेवला आहे. भारतीय राजकारणात प्रदीर्घकाळ राजकारण केलेल्या कॉम्रेड ए.बी. वर्धन यांनी एक धुळीनं भरलेलं जुनं लोखंडी कपाट, काही जोड्या कपडे, एक जोडी बूट, प्रवासात वापरण्यासाठी एक लाल रंगाची सूटकेस आणि त्यांच्यावर प्रेम करणाऱ्या त्यांच्या चाहत्यांची पत्रं इतकीच काय ती संपत्ती आपल्या मागं सोडली आहे.



इंदोरच्या मध्य प्रदेश पुरोगामी लेखक संघटनेचे अध्यक्ष आणि कॉम्रेड ए.बी. वर्धन यांचे निकटवर्तीय म्हणून ओळख असलेले विनीत तिवारी यांनी वर्धन यांना उद्देशून लिहिलेल्या निरोपाच्या पत्रात कॉम्रेड वर्धन यांच्या सत्शील आणि तत्त्वनिष्ठ जगण्यावर प्रकाश टाकला आहे. त्यात वर्धन यांनी आपल्या मागे सोडलेल्या साध्यासुध्या वस्तूंमुळे त्यांच्यातील साधेपणा, सच्चेपणा, लढावू बाणा, परोपकारी वृत्ती, कनवाळूपणा आणि साम्यावादी तत्त्वज्ञान जगणाऱ्या खऱ्याखुऱ्या कॉम्रेडचे दर्शन घडवले आहे



आपण मार्क्सवादी तत्त्वज्ञानानं प्रभावित होऊन कॉम्रेड वर्धन यांच्यासोबत काम करणे सुरू केलं नसून कॉम्रेड वर्धन यांनी मार्क्सचं तत्त्वज्ञान आपल्या जगण्यात उतरवल्याचं प्रत्यक्ष पाहिल्यामुळंच या विचारधारेकडे आपण वळल्याचं विनीत तिवारी यांनी आपल्या पत्रात म्हटलं आहे.



कॉम्रेड वर्धन यांच्या पत्नींचं निधन झाल्यानंतर ते
वर्धन यांची संपत्ती 
अजॉय भवन या पक्षाच्या कार्यालयातच राहू लागले. कोणत्याही राज्यातून तळागाळातील कार्यकर्त्यांना वर्धन अगदी सहज भेटत असत. त्या साठी त्यांनी कधीही अपॉइंटमेंट देण्याची कधीही गरज भासली नाही. सध्या आम आदमी पक्षात गेलेल्या सोनी सोरी आणि लिंगा यांना आपण वर्धन यांच्याकडे घेऊन गेल्यानंतर त्यांच्या मदतीसाठी त्यांनी थेट त्यावेळचे पंतप्रधान मनमोहन सिंग यांना पत्र लिहिल्याचंही ते नमूद करतात. 



तुरूंगात आजारी असलेल्या सीपीआय माओवादी कोबड घंडी यांच्या इलाजासाठी वर्धन यांनी केलेली धडपड आपण विसरू शकत नसल्याचं सांगत कार्यकर्ते आणि गरजूंसाठी आपलं आयुष्य अर्पण करण्याची त्यांची वृत्ती विनीत तिवारी यांनी अधोरेखित केली आहे.



२०१४ च्या लोकसभा निवडणूकीत सीपीआनं बिजू जनता दलासोबत आघाडी केल्यानंतर ( पुढे ही आघाडी झाली नाही) जास्तीत जास्त जागा मिळाव्यात या बदल्यात ओडिशातील पोस्को विरोधी चळवळ कमजोर केल्याचा आरोप कॉम्रेड वर्धन यांच्यावर झाला. हे खरे आहे का असे विचारले असता वर्धन यांनी आघाडी केली असली तरी मी तत्व सो़डून राजकारण करणारा व्यक्ती नाही असे ठामपणे सांगितल्याचा प्रसंगही विनीत यांनी नमूद केला आहे.



सच्चा आणि तत्त्वनिष्ठ कम्युनिस्टांच्या जुन्या पिढाचा एक बिनीचा शिलेदार अशीच कॉम्रेड ए. बी. वर्धन यांची ओळख होती आणि ती त्यांनी शेवटपर्यंत जपली. कम्युनिस्ट विचारधारेशी एकनिष्ठ राहून समर्पित आयुष्य जगणार्‍या कॉम्रे़ड वर्धन यांचे सन्यस्त वृत्तीचे उदाहरण भारतीय राजकारणात दुर्मिळ असेच आहे. 

0 टिप्पणी(ण्या):

टिप्पणी पोस्ट करा

सह्याद्री बाणाला भेट दिल्याबद्दल आभारी आहे. आपल्या प्रतिक्रिया आणि सूचना महत्वाच्या आहे. कृपया खाली प्रतिक्रिया द्याव्या.

-प्रकाश पोळ

.

.

 
Design by Wordpress Theme | Bloggerized by Free Blogger Templates | coupon codes